|| श्री गुरुदेव दत्त ||

|| श्री गणेश दत्त गुरुभ्यो नमः ||

श्री अवधूत चिंतन श्री गुरुदेव दत्त...

श्री गुरुदेव दत्त सेवा ट्रस्ट वारजे, पुणे ५८ या दत्त मंदिराची माहिती

सन १९९५ रोजी या मंदिराची जागा वारजे जकात नाका येथे विकत घेतली होती. आमच्या घराण्यात श्री दत्तात्रेयांची सेवा करणारे माझे आजोबा - कै. भाऊसाहेब रंगनाथ वाल्हेकर व त्यांचे चुलत बंधू कै. अरविंद बाबुराव वाल्हेकर (कानगाव - दौंड, पुणे) हे दोघेही मोठे श्री दत्त भक्त होते. तीच परंपरा वारसा यांचेकडून माझ्याकडे आला आहे.

१ जानेवारी २००५ रोजी सकाळ वर्तमानपत्रात प. पूजनीय योग तपस्वी श्री नारायण काका ढेकणे महाराज यांच्याविषयी फोटो छापून आला होता. ते कर्वेरोड येथील वासुदेव निवास येथील प्रमुख विश्वस्त म्हणून काम पाहत होते. तसेच नाशिक येथील प. पूजनीय श्री लोकनाथ तीर्थ स्वामी महाराज यांचा मठ असून तेथे प्रमुख विश्वस्त म्हणून काम पाहत होते. महाराजांना भेटण्याची तीव्र इच्छा झाल्याकारणाने मी दिनांक २४ फेब्रुवारी २००५ रोजी महाराजांच्या भेटीसाठी नाशिक ला प्रयाण केले. तेथे गेल्यानंतर मी पुण्याहून आपल्या भेटीसाठी आलो आहे. पुण्यात भेटला असता तरी चालले असते. त्यांनी विचारले काय काम काढले? तेव्हा मी म्हणालो कि मला आपणांकडून शक्तिपात दीक्षा हवी आहे, तसेच १९ जुलै २००५ ला श्री दत्त मंदिराची स्थापना आपल्या हस्ते करावयाची आहे हे सांगितले. ते म्हणाले जरा बसा व माझी विचारपूस करून चहा पान झाल्यानंतर सांगितले कि १९ तारखेला गुरु वक्री आहे त्यामुळे त्या दिवशी मूर्ती स्थापन करता येणार नाही. तेव्हा आपण नंतर पाहू. मी म्हणाली ठीक आहे महाराज परंतु मूर्ती स्थापना हि आपल्या हातूनच होणार आहे अन्यथा नाही असे म्हंटल्यावर त्यांनी स्मितहास्य करून म्हणले बर आपण असे करू दिनांक २६ जुलै २००५ ला दुपारी १२:३० वाजता स्थापना करू. त्यानुसार मी देखील त्यांना होकार दिला.

तत्पूर्वी महाराजांनी मला दिनांक १४ जुलै २००५ रोजीचे महायोग दीक्षा (शक्तिपात) पत्र दिले व सांगितले या दिवशी बरोबर सकाळी ६ वाजता बसा तुमचे काम होईल. त्यानुसार मला (शक्तिपात) दीक्षा झाली व श्री दत्त मूर्ती देखील काका महाराजांच्या हस्ते स्थापन झाली.

मूर्ती स्थापनेनंतर दररोज पूजा अर्चा असे दैनिक सर्वोपचार चालू होते परंतु या जगात काही समाजकंटक वृत्तीचे लोक असतात त्यांना हेय चांगले काम पाहवले नाही - अश्या समाजकंटकांनी २३ जुलै २०१२ रोजी मध्यरात्री मूर्तीची विटंबना केली. एक प्रकारे मनावर मोठा आघात झाला होता. सर्व थरातील नागरिक / दत्त भक्त सैरभर झाले होते. सर्व नागरिकांनी पोलीस स्टेशन वर मोर्चा काढला होता. मी माझे सद्गुरू श्री नारायण काका ढेकणे महाराज यांच्याशी फोनवर बोलणे झाले, ते म्हणाले हे संकट तुमच्यावर आले होते पण भगवंतांनी स्वतःवर घेतले आहे. तुम्ही खचून जाऊ नका सांगितलेली साधना चालू ठेवा. त्यामुळे मी पुन्हा जोमाने उभारी घेतली.

त्यानंतर दुसरी मूर्ती गुजरात येथील अंबाजी माता येथून आणली तिची स्थापना दिनांक २० ऑगस्ट २०१२ रोजी वासुदेव निवास येथील कोदणीकर गुरुजी यांचे हस्ते केली. परंतु मूर्तीच्या उजव्या हाताला दोष होता, ऐन दिवाळी मध्ये नरक चतुर्थीला मूर्तीचा हाथ खाली आला त्यामुळे मन पुन्हा दुखी झाले. आता वाटले बस झाले, सद्गुरू काका महाराजांच्या हातून ज्या पादुका मला मिळाल्यात आपण त्याचीच पूजा रोज करत जाऊ असे म्हणले आणि प्रत्यक्ष दत्तात्रेयांशी मी भांडलो कि आता माझी ताकद नाही. पण म्हणतात ना भगवंत हा कृपावंत आहे - दुसऱ्या दिवशी सकाळी देवळात गेलो व एवढ्यात पाठीमागून आवाज आला "वाल्हेकरजी", मागे पहिले तर प्रत्यक्ष श्री दत्तात्रेय "बजाज ऑटो कंपनीचे जनरल मॅनेजर श्री वालावलकर साहेब" उभे होते. त्यांनी माझ्या हातामध्ये १,२५,००० (एक लाख पंचवीस हजार) चेक दिला व म्हणाले कि आता आपण पंचधातूची मूर्ती बसवूयात. परंतु पंचधातू मूर्तीसाठी जवळ जवळ ३ लाख खर्च येणार होता. माझे वडील श्री बाळासाहेब भाऊसाहेब वाल्हेकर यांनी ५०,००० (पन्नास हजार) तर माझे मित्र श्री संजय ज्ञानोबा बराटे यांनी २५,००० (पंचवीस हजार) आणि उर्वरित रक्कम काही दत्तभक्त यांनी गोळा करून दिली. अशा रीतीने श्री दत्तमूर्ती (पंचधातू) घडविण्याचा कार्यक्रम २०१२ साली रामनवमीच्या दिवशी झाला. त्यानंतर तिसऱ्या पंचधातू मूर्तीची स्थापना नाशिक येथील लोकनाथ तीर्थ स्वामी महाराज येथील ट्रस्ट चे प्रमुख विश्वस्त श्री प्रकाश प्रभुणे महाराज यांचे हस्ते दिनांक १५ मे २०१३ रोजी झाली.

शुभभवन्तु